|
Весь желанием божественным объят был еси, святителю богоблаженне, горняя мудрствуя, а не земная, и богомысленным умом твоим выну предстоя Богу в молитвах непрестанных явился еси великий угодник Божий, и чудотворец, и присно предстательствующий о пастве твоей, тебе приносящей сия похвалы: Радуйся, священная главо, выну горняя мудрствующая. Радуйся, достойный носителю Божия благодати. Радуйся, врачу безмездый, туне врачевания расточаяй. Радуйся, сосуде драгоценный, целебное миро всем верным богатно изливаяй. Радуйся, многотекущая реко, напоившая сердца людей твоих ученьми спасительными. Радуйся, чаще всезлатая, черпиющая обилие дарований от дароподателя Христа и орошающая души к плодоношению духовному. Радуйся, отче благосердый, подражаяй благости Отца Небеснаго. Радуйся, струя милости неиссякаемая. Радуйся, радости многим ходатаю. Радуйся, печалей и скорбей утолителю. Радуйся, многообразие украшенный добродетельми. Радуйся, светло блистающий, лучами преславных чудес. Радуйся, святителю Арсение, усердный молитвенниче о душах наших. Ангели небеснии и сонмы святых радостно восприящи тя, егда святая душа твоя, мирно разрешившися уз плоти, возхождения в горняя идеже сподобился еси вечная славы в невечернем дни Царствия Христова юже и нам улучшити, умоли Христа Бога, да с тобою на Земли Живых воспоем Ему: Аллилуиа. Витийствующий язык человеческий не может изрещи обилие чудес твоих, Святителю Божий, яже при жизни и по смерти твоей источил еси и до ныне источаеши страждущим и недужным, врачебница во истину неоскудная явися священная твоя рака, к ней притекая, никтоже тощь и неутешен от тебе исходит, юже благоговейне обстояще, и мы с любовию к тебе вопием: Радуйся, беснуемых от томления диавольскаго свободивый. Радуйся, неисцельно болящих уврачевавый. Радуйся, слепым зрение даровавый. Радуйся, немым дар слова возвративый. Радуйся, расслабленных укрепивый. Радуйся, и мертвеца преславно воскресивый. Радуйся, святотатца грозно наказавый. Радуйся, покаяние того милостиво приявый. Радуйся, без страха Божия живших вразумивый. Радуйся, лишенных смысла, ум здравый ниспославый. Радуйся, от страхований вражних многия избавивый. Радуйся, и ина многа чудеса сотворивый. Радуйся, святой Арсение, усердный молитвенниче о душах наших. Подобно великому святителю и чудотворцу Николаю являешися во сне и яве, по своем представлении, святителю отче наш Арсение, извествуя велию благодать, данную тебе от Христа Бога, и неусыпное промышление твое о спасении жительствующих во святей обители твоей и всех с верою притекающих к твоему отеческому покрову. Явился бо еси во сне некому клирику и вещевал его не удалятися из твоея обители, и яве предстал еси благоговейному епископу Алексию, яко ангел Божий, дверем затворенным, вошед в его келлию и помолився иконе Спасовой, кротко вопросил его о месте пребывания архимандрита твоея обители. О сем прославляем дивнаго во святых своих Бога нашего и вопием: Аллилуиа. — 45 —
|