|
Радуйся, Алтаря Господня благоговейный предстателю. Радуйся, тайн Христовых достойный служителю. Радуйся, первосвятителя Киприяна собеседниче и сослужителю. Радуйся, того подвигов и добродетелей последователю. Радуйся, в управлении тебе ввереннем правду и милость возлюбивый. Радуйся, суды праведны и нелицеприятны творивый. Радуйся, тихостью нрава украсивыйся. Радуйся, бескорыстие и нищету духовную стяжавый. Радуйся, помощниче беспомощным. Радуйся, заступник сирым. Радуйся, ходатаю обидимым. Радуйся, защитниче напаствуемым. Радуйся, святой Арсение, усердный молитвенниче о душах наших. Во град Тверь прибыл еси, купно с первосвятителем Киприяном, богомудре Арсение, и зде во Отечествии твоем, явился еси яко звезда многосветлая, сияющая светом богоразумия и лучами добродетелей, яко дивитися всем согражданам твоим и воспевати за тя хвалебную песнь Пресвятей Троице: Аллилуиа. Видевша тя князь и людие тверстии Богоносна и всеми добродетельми украшена, просиша первосвятителя Киприяна, да поставит тя во архиерея граду Твери, да идеже ржден был еси ллотию тамо и духовную паству обрящеши от пастыреначальника Христа. Приими убо, иерарше Христов, и от нас, чад и сограждан твоих, сия хвалебныя песни: Радуйся, града Твери благоплодная отрасль и украшение. Радуйся, паствы тверския светило и удобрение. Радуйся, Евангелие Христова усердный благовестниче. Радуйся, апостольских преданий твердый хранителю. Радуйся, Слова Божия сладковещанный учителю. Радуйся, закона Господня одушевленныя скрижали. Радуйся нищетою временною богатство вечное стяжавый. Радуйся, молитвами и прощеньми блаженство горнее улучивый. Радуйся, приникший во глубину смирения. Радуйся, возшедый на высоту бесстрастия. Радуйся, вдов и сирот благосердый питателю. Радуйся, обидимых и гонимых многомощный заступниче. Радуйся, святой Арсение, усердный молитвенниче о душах наших. Боготечней звезде, древле путеводившей волхов к возсиявшему Солнцу Правды — Христу, уподобити тя дерзаем, святителю Божий Арсение. Словом бо твоим и добродетельным житием путь правый ко Христу словесней пастве твоей указал еси, и был еси путеводитель ко спасению многих, иже наставляем тобою, научишася богоприятно пети всех Творцу ангельскую песнь: Аллилуиа. Возсиял еси яко благосветлое светило на святительстем престоле паствы тверския, просвщая душих всех прибегающих к тебе, яко архиерею богоприятному. Его же молитва много може пред лицем Вседержителя Бога. Тем же и мы, охраняеми твоими святыми молитвами, благодарно тебе зовем: — 43 —
|