Молитвы за родных и близких

Молитва мученику Трифону

О святой мучениче Христов Трифоне, скорый помощниче всем, к тебе прибегающим и молящимся перед святым твоим образом скоропослушный предстателю! Услыши ныне и на всякий час моление нас, почитающих святую память твою, и предстательствуй о нас пред Господом на всяком месте. Ты бо, угодниче Христов, святый мучениче и чудотворче Трифоне, в великих чудесех возсиявый, прежде исхода твоего от жития сего пленнаго, молился еси за ны ко Господу и испросил еси у Него дар сей: аже кто в коей-либо нужде, беде, печали и болезни душевней или телесней призывати начнет святое имя твое, той избавлен будет от всякого прилога злаго. И якоже ты некогда дщерь цареву, во граде Риме от диявола мучиму, исцелил еси, сице и нас от лютых его коней сохрани во все дня жития нашего, наипаче же в день последняго нашего издыхания предстательствуй о нас. Буди нам тогда помощник и скорый прогонитель лукавых духов, и к Царствию Небесному предводитель, идеже ты ныне предстояши с лики святых у престола Божия. Моли Господа, да сподобит и нас причастниками быть присносущего веселия и радости, да с тобою купно удостоимся славити Отца и Сына и Святого Утешителя Духа во веки веков. Аминь.

Молитва святителю Иоанну Златоусту

О святителю великий Иоанне Златоусте! Ты многая и различная дарования от Господа приял еси, и яко раб благий и верный, вся данныя тебе таланты добре умножил еси: сего ради воистинну вселенский учитель был еси, яко всяк возраст и всяко звание от тебе получается. Се бо отроком послушания образ явился еси, юным — целомудрия светило, мужем — трудолюбия наставник, старым — незлобия учитель, иноком — воздержания правило, молящимся — вождь от Бога вдохновенный, мудрости ищущим — ума просветитель, ветиям доброглаголивым — слова живаго источник неисчерпаемый, благотворящим — милосердия звезда, начальствующим — правления мудрого образ, правды ревнителям — дерзновения вдохновитель, правды ради гонимым — терпения наставник: всем вся был еси, да всяко некия спасаеши. Над всеми же сии стяжал еси любовь, яже есть соус совершенства, и тою, яко силою Божественною, вся дарования в души твоей во едино совокупил еси, и туюдже любовь, разделенная примиряющую, в толковании словес апостольских всем верным проповедал еси. Мы же грешнии, по единому кийиждо свое дарование имуще, единения душа и союз мира не имамы, но бываем тщеславни, друг друга раздражающе, друг другу завидяще: сего ради дарования наша разделенная не в мир и спасение, но во вражду и осуждение нам преложишася. Тем же к тебе, святителю Божий, припадаем, раздором обуреваеми, и в сокрушении сердца просим: молитвами твоими отжени от сердец наших всяку горесть и зависть, нас разделяющия, да во мнозех удех едино тело церковное невозбранно пребудем, да по словеси твоему молитвенному возлюбим друг друга и единомыслием исповемы Отца и Сына и Святаго Духа, Троицу Единосущную и Нераздельную, ныне и присно и во веки веков. Аминь.