Молитвенное приношение старца Софрония

Яко Тя хвалят вся силы небесныя, и Тебе славу возсылаем Отцу и Сыну и Святому Духу, ныне и присно и во веки веков.

Аминь.

Прошение третье

БОЖЕ, СОДЕТЕЛЮ НАШ, призри на ны, грешныя и непотребныя рабы Твоя, и внегда призывати нам святое и поклоняемое Имя Твое, не посрами нас от чаяния милости Твоея; даруй нам, Господи, вся потребная ко спасению, и сподоби нас любити и боятися Тебе от всего сердца нашего, и творити во всем волю Твою. Ты бо еси Бог наш, немолчными песньми и непрестанными славословеньми от святых сил воспеваемый, исполни и наша уста хваления Твоего, еже подати величествие Имени Твоему святому, и даждь нам участие и наследие со всеми боящимися Тебе истиною и хранящими заповеди Твоя, молитвами Всесвятыя Богородицы и Приснодевы Марии, предстательством честных небесных сил безплотных и всех от века святых Твоих.

Яко Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.

Аминь.

Прошение четвертое

БОЖЕ ВЕЛИКИЙ И ВЕЧНЫЙ, един истинный и праведный, един щедрый и милостивый: да приидет Дух Твой на нас, и сила Твоя да осенит нас; простри от святаго жилища Твоего невидимую руку Твою, и благослови всех нас, и даждь нам по благости Твоей неизменно пребыти в путех воли Твоея, и даже до последняго издыхания нашего неотступно покрый нас безмерным Твоим благоутробием.

Ты бо един еси Защититель наш и Покровитель, и Тебе славу возсылаем, Отцу и Сыну и Святому Духу, ныне и присно и во веки веков.

Аминь.

Прошения о храме и о монастыре

На сугубой ектении

ГОСПОДИ ИИСУСЕ ХРИСТЕ, пред мироискупительною Страстию Твоею моливыйся Отцу Твоему, да вси исповедающии Имя Твое едино будут, удовли вся ны к совершению заповеди Твоея сея, силою и наитием Всесвятаго Духа Твоего; молим Ти ся, услыши и помилуй.

ИИСУСЕ ХРИСТЕ, Боже Спасителю наш, раздаянием огненных языков в пятидесятный день вся языки призвавый в соединение, молим Тя, низпосли на ны дар Духа Твоего Святаго, да исполнятся сердца наша истинныя любве ко искреннему нашему и ко всякому разумному созданию Твоему; молим Ти ся, услыши и помилуй.

Еще молимся о милости, жизни, мире, здравии, спасении, и благопоспешении рабов Божиих (имена); благодатию и щедротами Твоими, Господи, исполни вся прошения их; прости им всякое согрешение вольное и невольное; благоприятны да будут мольбы и милостыни их пред Престолом владычествия Твоего; покрый их от враг видимых и невидимых, от всякия напасти, беды и скорби свободи, и даждь им мир, здравие и долгоденствие; молим Ти ся, милосердне Господи, услыши ны и скоро помилуй.