Молитвенное приношение старца Софрония

Заамвонная молитва

ВЕЛИЙ ЕСИ, ГОСПОДИ, и несть подобнаго Тебе. Милость и истина предъидита пред Лицем Твоим, правда и суд исходита от Престола Твоего. Блажени людие, хранящие завет Твой: во свете Лица Твоего пребудут и о Имени Твоем возрадуются и правдою Твоею укрепятся: Ты бо еси сила их, и во благоволении Твоем вознесутся, и во истине Твоей прославятся.

Господи, помощь Твою положи на нас, и стеною милости Твоея огради нас. Рука Твоя да заступит нас, и мышца Твоя да укрепит нас.

Господи, внегда призвати нам Тебе, приклони ухо Твое к нам: Ты бо еси Отец наш, не отрини убо нас в скорби нашей. Ты един еси Заступник спасения нашего, не презри нас и не предаждь нас в поношение врагом нашим.

Господи, Боже наш, благоволивый малому стаду Твоему завещати Царство неколеблемое и сокровище неоскудеваемое на небесех, услыши моление наше и прииди во еже заступити ны от всех гонящих нас. Един еси, сведый тайная сердца всякаго, не скрый от нас воли Твоея и пути спасения Твоего.

Неизследима судеб Твоих бездна, и совети Твои непостижимы; всем человеком хотяй спастися и в разум истины Твоея приити, изведи ны из рова падения нашего, и всякое недоумение от сердец наших отыми.

Ты бо еси Бог спасения нашего, инаго бо разве Тебе не вемы, и Имя Твое именуем, и славу Твою воспоем со всеми святыми во веки веков.

Аминь.

Заамвонная молитва иная

ВОЗСИЯЙ НАМ, Боже, Боже наш, Свет Твой истинный, да во Свете Твоем узрим славу твою, яко Единороднаго от Отца, и да вообразится внутрь нас образ Твой непостижимый, по нему же создал еси человека.

Боже, Спасителю наш, Сило ума и Крепосте души нашея, да вселится в нас доброта Твоя, да пребудем неотступно в Тебе, присно носяще в себе Духа Твоего Святаго, Иже да даст нам познати любовь Твою к человеку, и уподобитися Тебе, Единому Господу и Богу нашему, якоже быша подобнии Тебе вся от века святии Твои.

Ей, Господи Иисусе Христе, по неложному Твоему обетованию, прииди со Отцем и Духом Святым, и обитель Твою в нас сотвори во веки веков.

Аминь.

ДУХОВНИЧЕСКИЕ МОЛИТВЫ

Разрешительная молитва

ОТЧЕ НАШ НЕБЕСНЫЙ, Боже Вседержителю, хотяй всем человеком спастися и в разум истины Твоея приити, Тебе просим и Тебе молим, Господи: подаждь спасение рабом Твоим сим, и всю болезнь их утоли. Избави я от всякаго рабства греховнаго. Прости им прегрешения их, вольная и невольная, исповеданная или студом или забвением утаенная. Яко Ты един еси имеяй власть разрешити связанныя и исправити низверженныя. На Тя бо, Господи, все упование и чаяние наше возлагаем, яко Ты еси щедр и многомилостив. Даруй убо рабом Твоим сим прощение грехов и жизнь вечную причащением честнаго Тела и Крове Христа Твоего.